Suporta ng KOSMA sa Pangulong Aquino

Dumalo ang KOSMA (Koalisyon ng mga Organisadong Samahan sa Maynila) sa inagurasyon ng Pangulong Noynoy Aquino noong Hunyo 30, 2010 sa Quirino Grandstand, Luneta. Alas-sais pa lang ng umaga ay nagsimula nang maglakad ang daan-daang miyembro ng KOSMA na isinusulong ang disenteng pabahay. Nilakad nga mga tao ang kahabaan ng Roxas Boulevard mula Anda Circle hanggang Quirino Grandstand.

Nagsuot ng dilaw ang KOSMA upang ihayag ang suporta sa pangulo. Nakapwesto sa unahan ang mga batang nakadamit anghel na may bitbit pang mga trompeta. Nakakabit sa trompeta ang kanilang mga mensahe para sa Pangulong Aquino - 'Ikaw ang aming pag-asa!', 'Sapat na relokasyon!' at 'Kasiguruhan sa paninirahan!'.

Dala-dala rin ng KOSMA ang mga maliliit na bahay na gawa sa karton. Sinisumbulo nito marahil ang pagkakaisa at "bayanihan" ng mga samahan sa pagtataguyod ng kanilang karapatan sa bahay at lupa. Tulad ng nakasaad sa isang bandilang kanilang winawagayway, naniniwala ang KOSMA na ang 'Pabahay [ay] posible kay Pangulong Noynoy.'

LIAC Meeting (June 23, 2010)

Nagsimula na ang pakikipagusap ng Local Inter-Agency Committee (LIAC) tungkol sa Road Widening Project ng Department of Public Works and Highways (DPWH) sa R-10 Tondo. Naganap ito noong nakaraang Hunyo 23, 2010 sa opisina ng DPWH sa may Baseco. Isang tagumpay para sa mga tao ang pagtanggap ng gobyerno sa kanilang panukalang magkaroon muna ng sapat na relokasyon bago ang demolisyon. Nilinaw ang mga tungkulin at itinalaga ang mga responsibilidad ng iba’t ibang kasangkot na ahensiya at organisasyon para sa maayos at mapayapang pagpapatupad ng proyekto.

Nagbigay ng suporta ang mga residente ng R-10 at nag-abang ng resulta ng miting sa labas ng DWPH.

Umaasang makakakuha ng karagdagang detalye sa susunod na miting sa darating na Hunyo 29 na gaganapin sa National Housing Authority, Quezon City.